राज्याच्या अर्थव्यवस्थेची लाख कोटी डॉलरकडे झेप!

अन्य राज्यांच्या तुलनेत महाराष्ट्राच्या अर्थव्यवस्थेची घोडदौड लाख कोटी डॉलर अर्थव्यवस्था होण्याकडे होत असल्याचा दावा मुख्यमंत्री देवेंद्र फडणवीस यांनी केला आहे. फिक्की संघटनेच्या एका परिषदेत ते बोलत होते. गेल्या तीन वर्षांत राज्यात पायाभूत सुविधांच्या विकासाला चालना दिल्यामुळे अर्थव्यवस्थेची वाटचाल लाख कोटी डॉलरकडे होत असल्याचे त्यांनी स्पष्ट केले.

फडणवीस म्हणाले, देशात आलेल्या एकूण थेट परदेशी गुंतवणुकीपैकी सुमारे ५० टक्के गुंतवणूक एकट्या महाराष्ट्रात आली आहे. आजपर्यंत राज्य उद्योग व व्यवसाय यांच्यात अग्रेसर राहिले आहे. राज्यातील नेतृत्वाला आव्हान दिले गेले, त्यावर अविश्वास दाखवला गेला तरीही राज्याची दमदार वाटचाल सुरू आहे. गेल्या तीन वर्षांतील प्रयत्नांमुळे राज्याला पुन्हा एकदा पहिल्या क्रमांकावर नेण्यास विद्यामान सरकार यशस्वी झाले आहे, असा दावाही फडणवीस यांनी केला.

महाराष्ट्राची थेट स्पर्धा परदेशी गुंतवणुकीच्या बाबतीत दिल्ली, कर्नाटक व गुजरात या राज्यांशी आहे. २०१६-१७मध्ये राज्यात एकूण थेट परदेशी गुंतवणुकीपैकी ५३ टक्के थेट परदेशी गुंतवणूक आली होती. केंद्र सरकार राबवत असलेल्या सुधारणांमुळे भारताला जागतिक स्पर्धेला तोंड देणे शक्य झाले असल्याचेही मुख्यमंत्र्यांनी सांगितले. राज्यात ५.९६ लाख कोटी रुपयांचे पायाभूत सुविधा प्रकल्प सुरू करण्यात आले आहेत. आगामी काळात एक लाख कोटी रुपयांचे पायाभूत सुविधा प्रकल्प सुरू करण्याचा राज्य सरकारचा मानस आहे. यामुळे मोठ्या प्रमाणावर उद्योग व सेवा क्षेत्रात रोजगाराच्या संधी निर्माण होणार आहेत. या संधींमध्ये आयटी व आयटी आधारित उद्योगांतून बऱ्याच संधी असतील, याकडेही फडणवीस यांनी लक्ष वेधले.