'टाटा'च्या प्रमुखपदी नोएल टाटांचे नाव सध्या चर्चेत

noel tataटाटा इंटरनॅशनलचे सर्वेसर्वा नोएल टाटा यांची १०३ अब्ज डॉलरची उलाढाल असणाऱ्या टाटा समूहाच्या प्रमुखपदी निवड होण्याची शक्यता आहे टा इंटरनॅशनलचे सर्वेसर्वा नोएल टाटा यांची १०३ अब्ज डॉलरची उलाढाल असणाऱ्या टाटा समूहाच्या प्रमुखपदी निवड होण्याची शक्यता सांगण्यात येत आहे. टाटा सन्समध्ये ६६ टक्के हिस्सेदारी बाळगणाऱ्या आणि अनेक धर्मादाय संस्थांचे आश्रयदाते असणाऱ्या टाटा ट्रस्टचे प्रमुख असणाऱ्या रतन टाटा यांचे नोएल हे सावत्र भाऊ आहेत. या विषयी प्रतिक्रिया देण्यास टाटा ट्रस्टतर्फे नकार देण्यात आला. रतन टाटा यांचा उत्तराधिकारी कोण, या विषयी यापूर्वी अनेक अंदाज व्यक्त करण्यात आले होते. मात्र, २०११मध्ये टाटा समूहाच्या प्रमुखपदी नोएल टाटा यांचे मेहुणे सायरस मिस्त्री यांची निवड करण्यात आली होती. मिस्त्री यांनी २०१२मध्ये पदाची सूत्रे हाती घेतली. मात्र, २०१६मध्ये त्यांची पदावरून हकालपट्टी करण्यात आल्यापासूनच नोएल यांचे नाव चर्चेत होते. मात्र, जानेवारी २०१७मध्ये तत्कालीन टाटा कन्सल्टन्सी सर्व्हिसेसचे सीईओ एन. चंद्रशेखरन यांची टाटा सन्सच्या चेअरममपदी नियुक्ती झाली आणि नोएल यांच्या नावाची चर्चा थांबली. रतन टाटा यांच्या नेतृत्त्वाखालील टाटा ट्रस्टतर्फे लवकरच नियुक्त्यांबाबत निर्णय घेतला जाण्याची शक्यता असून, उपाध्यक्षपदाचीही सूत्रे लवकरच सोपविली जाण्याची शक्यता आहे. सूत्रांनी दिलेल्या माहितीनुसार उपाध्यक्षपदासाठी कोणत्याही नावाची चर्चा नाही.